ઇન્ડિયન પ્રીમિયર લીગની 17મી સિઝનમાં રાજસ્થાન રોયલ્સ ટીમનું પ્રદર્શન અત્યાર સુધીનું સર્વશ્રેષ્ઠ રહ્યું છે. ગઇકાલે રાજસ્થાનની ટીમે લખનૌ સુપર જાયન્ટ્સ સામેની મેચમાં 7 વિકેટે જીત મેળવીને પ્લેઓફ માટે પોતાનું સ્થાન લગભગ નિશ્ચિત કરી લીધું છે.
લખનૌ ટીમના કેપ્ટન કેએલ રાહુલે જણાવ્યું હારનું કારણ
આ મેચમાં લખનૌ સુપર જાયન્ટ્સે પ્રથમ બેટિંગ કરતા કેપ્ટન કેએલ રાહુલના 76 રન અને દીપક હુડ્ડાના 50 રનની મદદથી 20 ઓવરમાં 196 રન બનાવ્યા હતા. ટાર્ગેટનો પીછો કરવા ઉતરેલી રાજસ્થાન રોયલ્સ ટીમે 78 રન સુધી 3 વિકેટ ગુમાવી દીધી હતી, પરંતુ સંજુ સેમસન અને ધ્રુવ જુરેલે ચોથી વિકેટ માટે 100થી વધુ રનની ભાગીદારી કરી અને આ મેચમાં ટીમને આસાન જીત અપાવી હતી . રાજસ્થાન રોયલ્સ સામેની મેચમાં મળેલી હાર બાદ લખનૌ ટીમના કેપ્ટન કેએલ રાહુલે સ્વીકાર્યું કે તેમની ટીમે મેચમાં 20 થી 25 રન ઓછા બનાવ્યા હતા.
જો 20-20 વધુ રન બનાવ્યા હોત, તો..
કેએલ રાહુલે રાજસ્થાન રોયલ્સ સામેની મેચમાં હાર બાદ કહ્યું કે મને લાગે છે કે અમે આ મેચમાં 20 રન ઓછા બનાવ્યા છે. અમને સારી શરૂઆત મળી ન હતી, પરંતુ મારી અને હુડાની ભાગીદારી સારી રહી હતી. 15મી ઓવર સુધીમાં અમે 150 રનની નજીક પહોંચી ગયા હતા પણ આ પછી અમારે વધુ રણ બનાવવાની જરૂર હતી. તે સ્પષ્ટ છે કે જે ટીમ વધુ છગ્ગા ફટકારે છે તે અંતમાં જીતવામાં સફળ થાય છે. અમે પણ આ જ વિચાર સાથે મેદાનમાં ઉતર્યા હતા પરંતુ 2 વિકેટ વહેલી ગુમાવવાના કારણે અમારે થોડી સાવધાનીથી રમવું પડ્યું હતું. જો હુડ્ડા અને મેં 20-20 વધુ રન બનાવ્યા હોત, તો અમે આરામથી 220ના સ્કોર સુધી પહોંચી શક્યા હોત, જે આ મેચમાં મોટો તફાવત લાવી શક્યો હોત.
છેલ્લી ઓવરોમાં અમારે બિશ્નોઈનો ઉપયોગ કરવો હતો
રાજસ્થાન રોયલ્સ સામેની મેચમાં બોલિંગ કરતી વખતે લખનૌની ટીમે તેના સૌથી મહત્વપૂર્ણ બોલર રવિ બિશ્નોઈને બોલિંગ આક્રમણમાં લાવવામાં ઘણો વિલંબ કર્યો હતો, જેના વિશે કેએલ રાહુલે કહ્યું હતું કે અમે વિચાર્યું હતું કે છેલ્લી ઓવરોમાં અમે બિશ્નોઈનો ઉપયોગ કરીશું. પરંતુ તેઓ અમારા પર સતત દબાણ રાખતા હતા. તેથી અમે તેને બોલિંગ પર લાવવા માટે યોગ્ય વ્યૂહરચના સાથે આગળ વધી શક્યા નહીં. અમે ઇચ્છતા હતા કે તે શિમરોન હેટમાયર અને રોવમેન પોવેલ સામે બોલિંગ કરે કારણ કે અમે જાણતા હતા કે તે તેમની સામે વધુ સારી બોલિંગ કરી શકે છે.
