પશ્ચિમ બંગાળના કોલકતામાં ડોક્ટરોએ એક મહિલાના ફેફસામાંથી નાકની સોનાની નથણી બહાર કાઢીને તેનો જીવ બચાવ્યો હતો. વર્ષા સાહુ નામની મહિલા 17 વર્ષથી આ નથણી પહેરી રહી હતી પરંતુ એક દિવસ નથણીનો પેચ ઢીલો થઈ જતાં શ્વાસ વાટે તે ગળામાં સલવાઈ ગઈ હતી અને ત્યાર બાદ ફેફસામાં ચોંટી ગઈ હતી. આ નથણી ફેફસામાં આમે જ રહી જાત પરંતુ તેને શરીરમાં તકલીફ પડવા લાગતાં તે ડોક્ટર પાસે પહોંચી ત્યારે આ વાત સામે આવી હતી.
કેવી રીતે ઘુસી ફેફસામાં
35 વર્ષીય વર્ષાએ કહ્યું, મને ખબર નહોતી કે નોઝ પિનનો સ્ક્રૂ ઢીલો થઈ ગયો છે. આ ઘટના લગભગ બે મહિના પહેલાની છે. વર્ષાએ જણાવ્યું કે હું માત્ર વાત કરી રહી હતી, આ દરમિયાન મેં ઊંડો શ્વાસ લીધો તો નાકની પિન અંદર જતી રહી. મને ખબર નહોતી કે નાકની પિન મારા શ્વસનમાર્ગમાં ગઈ હતી. મને લાગ્યું કે પિન પેટમાં ગઈ છે. માર્ચ મહિનામાં જ્યારે શ્વાસ લેવામાં તકલીફ પડતી હતી અને તેની સાથે ખાંસી અને ન્યુમોનિયાની ફરિયાદ પણ હતી ત્યારે આ વાત પ્રકાશમાં આવી હતી. આ પછી, તે ડોક્ટર પાસે ગઈ. જો કે, જો દવાથી રાહત ન મળી, તો વર્ષા પલ્મોનોલોજિસ્ટની સલાહ લેવા ગઈ. આ પછી સીટી સ્કેન કરવામાં આવ્યું હતું અને સ્ક્રૂ ફેફસામાં ફસાયેલો જોવા મળ્યો હતો.
ડોક્ટરે ગણાવ્યો અતિ દુર્લભ કેસ
ફેફસામાંથી સ્ક્રૂ દૂર કરવા માટે કોલકાતાની મેડિકા સુપરસ્પેશિયાલિટી હોસ્પિટલમાં સર્જરી કરવામાં આવી હતી. પલ્મોનોલોજિસ્ટ ડો.દેબરાજ જાશે આ કેસને ખૂબ જ દુર્લભ ગણાવ્યો હતો. ડોક્ટરે જણાવ્યું હતું કે જ્યારે ડ્રાયફ્રૂટ્સ અથવા સોપારી લોકોના ફેફસાંમાં ઘૂસી જાય છે ત્યારે તેમણે ક્યારેક ક્યારેક કેસ નોંધ્યા છે, પરંતુ મોટાભાગના કિસ્સાઓ નાના બાળકો અથવા 80 વર્ષથી વધુ ઉંમરના વૃદ્ધ લોકો છે પરંતુ 30 વર્ષની મહિલાના કિસ્સામાં આવું બન્યું હોય તેવું પહેલી વાર જોયું. ડોક્ટરોએ બ્રોન્કોસ્કોપ સાથેનો એક નાનો કેમેરો દાખલ કરીને નથણીને ફેફસામાંથી ખેંચી કાઢી હતી.
