IPL 2024 / 11 ચોગ્ગા અને 6 સિક્સર, 15 બોલમાં ફટકાર્યા 50 રન, મેકગર્કની તોફાની બેટિંગથી પંડ્યા-બુમરાહ ધોવાયા

મુંબઈ ઈન્ડિયન્સ સામેની મેચમાં દિલ્હી કેપિટલ્સના બેટ્સમેન જેક ફ્રેઝર મેકગર્કે માત્ર 27 બોલમાં 84 રનની ઈનિંગ રમી હતી. આ વિસ્ફોટક ઇનિંગમાં તેણે 11 ફોર અને 6 સિક્સર ફટકારી છે. આ મેચ દિલ્હીના અરુણ જેટલી સ્ટેડિયમમાં રમાઈ હતી, તેથી દિલ્હી કેપિટલ્સના ચાહકોએ મેકગર્કની આ ઇનિંગને ખૂબ જ એન્જોય કરી હતી. જ્યારે મેકગર્ક 84 રન બનાવીને આઉટ થયો ત્યારે મેદાનમાં હાજર હજારો લોકોએ સ્ટેન્ડિંગ ઓવેશન આપ્યું હતું. મેકગર્કે ઇનિંગની ચોથી ઓવરમાં માત્ર 15 બોલમાં ફિફ્ટી ફટકારી હતી અને તેની 84 રનની ઇનિંગથી દિલ્હીનો સ્કોર 257 રન થયો હતો.

IPL 2024માં સૌથી ઝડપી અડધી સદી ફટકારનાર ખેલાડી

મેકગર્ક મુંબઈ ઈન્ડિયન્સ વિરુદ્ધ 311 થી વધુના સ્ટ્રાઈક રેટ સાથે રમી રહ્યો હતો, તેથી તે સ્ટેન્ડિંગ ઓવેશન મેળવવાનો સંપૂર્ણ લાયક છે. તેમના સન્માનમાં ઉભા રહેલા લોકોના ફોટા સોશિયલ મીડિયા પર વાયરલ થઈ રહ્યા છે. મેકગર્ક IPL 2024માં સૌથી ઝડપી અડધી સદી ફટકારનાર ખેલાડી પણ છે. આ સિવાય મેકગર્ક એવો બેટ્સમેન પણ છે જેણે ઈન્ડિયન પ્રીમિયર લીગના ઈતિહાસમાં સૌથી ઝડપી ફિફ્ટી ફટકારી છે. તેણે આ સિઝનમાં બે વખત 15 બોલમાં અડધી સદી પૂરી કરી છે. મેકગર્ક IPLના ઈતિહાસમાં 15 કે તેથી ઓછા બોલમાં બે વખત ફિફ્ટી ફટકારનાર એકમાત્ર ખેલાડી બન્યો છે.

આ પણ વાંચોઃ '...તો હું ટીમ ઇન્ડિયાને', શું T20 વર્લ્ડકપમાં શુભમન ગિલની થશે પસંદગી? આપ્યો ધારદાર જવાબ

IPL 2024માં મેકગર્કની વિસ્ફોટક બેટિંગ

IPL 2024માં જેક ફ્રેઝર મેકગર્કે અત્યાર સુધી 5 મેચમાં 49.4ની શાનદાર એવરેજથી 247 રન બનાવ્યા છે. 5 મેચમાં 3 અડધી સદીની ઇનિંગ્સ રમવી એ સાબિતી છે કે મેકગર્ક કેટલી શાનદાર લયમાં ચાલી રહ્યો છે. તે આ સિઝનમાં શ્રેષ્ઠ સ્ટ્રાઈક રેટ સાથે રમનાર બેટ્સમેન પણ છે. તેણે IPL 2024માં 237.5ના તોફાની સ્ટ્રાઈક રેટથી બેટિંગ કરી છે. તેના આગમન સાથે, દિલ્હી કેપિટલ્સની ટોપ ઓર્ડરની બેટિંગ ઘાતક બની ગઈ છે.