બનાવ / ગરમી વધતા ગુજરાતમાં આગ લાગવાની ઘટના વધી, દુકાન, ઈન્ડસ્ટ્રીઝ, ઘર આગની ઝપેટમાં, એકજ દિવસમાં 4 બનાવ

ઉનાળો અને આગ આ બે શબ્દ જાણે એકબીજાના પર્યાય બન્યા હોય તેમ વર્તમાનમાં આગની ઘટનાઓ બની રહી છે. ગરમી વધવાની સાથે આગ લાગવાના બનાવો પણ વધી રહ્યા છે. રાજ્યમાં એક જ દિવસમાં 4 સ્થળો પર આગની ઘટના બની હતી. નડિયાદમાં અમદાવાદી બજારમાં એક સાથે 3 દુકાનમાં આગ લાગી હતી. જેમાં 2 કાર અને 3 વાહન આગની ઝપેટમાં આવી ગયા હતા. તો અમરેલીની બાબરા GIDC-2માં પ્લાસ્ટિકના દાણા બનાવતી ફેક્ટરીમાં આગ લાગી હતી. ડાયમંડ સિટી સુરતના પલસાણાની જય ઈન્ડસ્ટ્રીઝમાં પણ આગ લાગતાં બારડોલી, પલસાણા અને SMCની ફાયર ટીમોએ આગ પર કાબૂ મેળવવા દોડધામ કરવી પડી હતી. જ્યારે આણંદના ઉમરેઠમાં એક રહેણાંક મકાનમાં આગ લાગતાં ઘરવખરી બળીને ખાક થઈ ગઈ હતી.

ખેડાની અમદાવાદી બજારમાં આગ

વિગતે વાત કરીએ તો ખેડાના નડિયાદમાં આવેલી અમદાવાદી બજારમાં આગ એકાએક આગ લાગતા દોડધામ મચી જવા પામી હતી. બજારમાં એક સાથે 3 દુકાનમાં ભીષણ આગ લાગતા 3 વાહન ઝપેટમાં આવ્યા હતાં. જેમાં 2 કાર સહિત 3 વાહનોને મોટું નુકસાન પહોંચ્યું હતું. ફાયર વિભાગે ભારે જહેમત બાદ આગ પર કાબૂ મેળવ્યો હતો. તો આગ લાગવાના પ્રાથમિક અનુમાનમાં શોર્ટ સર્કિટના હોવાનું જાણવા મળ્યું છે.

અમરેલીમાં પ્લાસ્ટીકની ફેક્ટરીમાં આગ

અમરેલીના બાબરાની GIDC-2માં પ્લાસ્ટીકના દાણા બનાવતી ફેક્ટરીમાં ભીષણ આગ લાગી હતી. રુદ્ર એન્ટરપ્રાઈઝ કંપનીમાં આગ લાગતા દૂર સુધી ધુમાડાના ગોટે ગોટા પ્રસર્યા હતાં. બાબરા ફાયર વિભાગની ટીમે આગ પર કાબૂ મેળવ્યો હતો

સુરતની જય ઈન્ડસ્ટ્રીઝમાં લાગી આગ

સુરતના પલસાણામાં આગની ઘટના બની છે. જય ઈન્ડસ્ટ્રીઝમાં આગનો બનાવ બનતા બારડોલી,પલસાણા અને SMCની ફાયરની ટીમ ઘટનાસ્થળે પહોચી હતી. આગ એટલી વિકરાળ હતી કે 5 કિમી સુધી ધૂમાડાના ગોટેગોટા દેખાયા હતા. ફાયર વિભાગ દ્વારા આગ પર કાબૂ મેળવવાનો પ્રયાસ કર્યો હતો.

વાંચવા જેવું: 'ઘમાસાણ શાનું હતું', સી.આર.પાટીલે ભાજપના કાર્યકરોને આપી કડક ચેતવણી, સાબરકાંઠાનો મુદ્દો

આણંદમાં ઘરમાં લાગી આગ

આણંદના ઉમરેઠની તીર્થ સોસાયટીના એક મકાનમાં આગની ધટના બની હતી. આગમાં ઘરવખરીનો સામાન બળીને ખાક થઇ ગયો છે. શોર્ટ સર્કિટથી આગ લાગી હતી. ઉમરેઠ ફાયરની ટીમે ઘટનાસ્થળે પહોંચી આગ પર કાબૂ મેળવ્યો હતો.