અરવલ્લી જિલ્લાની વધુ એક નદીમાં પૂરની સ્થિતિ સર્જાણી છે. ધામણી નદીમાં ભારે પૂર આવતા બાયડનું ચપલાવત ગામ સંપર્ક વિહોણું બન્યું છે. નદીમાં એકાએક પૂર આવતા ગામમાં જવાનો રસ્તો બંધ થયો છે. પૂરને લઈને 30 જેટલા વિદ્યાર્થીઓ શાળાએ ફસાયા છે. આ વિદ્યાર્થીઓ નદી ઓળંગીને શાળાએ ગયા હતા અને પૂર આવતા તેઓ શાળાએ જ ફસાયા છે.
ઉલ્લેખનીય છે કે આ ઘટના અંગે મળતી વિગત અનુસાર અરવલ્લીના ચપલાવત ગામના વિદ્યાર્થીઓ નદીને બીજે પાર શાળામાં ગયા હતા. ત્યારે અચાનક અતિભારે વરસાદ થતા ધામણી નદીમાં એકાએક પૂર આવતા ગામમાં પરત જવાનો રસ્તો બંધ થઇ જવા પામ્યો હતો. જો કે આ ઘટનાને પગલે શાળાએ ગયેલા 30 જેટલા વિદ્યાર્થીઓ શાળામાં ફસાઈ જતા પરીવારજનો પરેશાન થઇ ગયા હતા.
પાણીનો પ્રવાહ વધારે હોવાથી ગ્રામજનો પણ હેરાન થઇ ગયા હતા અને ચિંતામાં મૂકાઇ ગયા અને વિદ્યાર્થીઓને શાળામાંથી બહાર નહીં નીકળવા સૂચના આપી હતી. આપને જણાવી દઇએ કે આજ રોજ અરવલ્લીની હાથમતી નદીમાં પણ પૂરની સ્થિતી જોવા મળી હતી અને નદી બે કાંઠે વહેતા ગ્રામજનો નદી કાંઠે આવી પહોચ્યા હતા.