શિક્ષણ / RTE Gujarat Admission: હવે પ્રથમ રાઉન્ડમાં પ્રવેશથી વંચિત વિદ્યાર્થીઓને અપાશે તક, હાલ કેટલી બેઠકો ખાલી?

ગાંધીનગર: રાજ્યની ખાનગી શાળાઓમાં આરટીઈ હેઠળ ખાલી રહેલી બેઠકો પર પ્રવેશનો બીજો રાઉન્ડ હાથ ધરવામાં આવશે. ખાનગી શાળાઓની આરટીઈ હેઠળની 45 હજાર બેઠકોમાંથી પ્રથમ રાઉન્ડમાં 36,607 બેઠકો પર વિદ્યાર્થીઓને પ્રવેશની ફાળવણી કરવામાં આવી છે. જ્યારે પ્રથમ રાઉન્ડ બાદ 8393 સીટો ખાલી રહી છે. ખાલી સીટો પર પ્રવેશ ફાળવવા માટે પ્રવેશનો બીજો રાઉન્ડ યોજાશે જેમાં પ્રવેશથી વંચિત રહેલા વિદ્યાર્થીઓને શાળાઓની ફરીથી પસંદગી કરવાની તક આપવામાં આવશે.

પ્રવેશ માટે બીજો રાઉન્ડ હાથ ધરાશે

રાઈટ ટુ એજ્યુકેશન હેઠળ ગરીબ અને આર્થિક રીતે નબળા વર્ગના બાળકોને અભ્યાસ માટે ખાનગી સ્કૂલોમાં 25 ટકા બેઠકો પર દર વર્ષે ધોરણ 1 માં પ્રવેશ આપવામાં આવે છે. ત્યારે રાજ્યની ખાનગી શાળાઓમાં આરટીઈ હેઠળ 45 હજાર બેઠકો આવે છે, જેના પર પ્રવેશના પહેલા રાઉન્ડની કામગીરી પૂર્ણ થઈ ચુકી છે. પ્રથમ રાઉન્ડમાં 36,607 બેઠકો પર વિદ્યાર્થીઓને પ્રવેશની ફાળવણી કરવામાં આવી છે. પહેલા રાઉન્ડ બાદ બાકી રહેલી 8 હજાર જેટલી ખાલી સીટો પર પર પ્રવેશ માટે બીજા રાઉન્ડની જાહરાત કરવામાં આવી છે. આ માટે વાલીઓ સ્કુલની પસંદગી ઓનલાઈન કરી શકશે. બીજા રાઉન્ડમાં પ્રવેશની પ્રક્રિયા 8 મે સુધી ચાલશે, વાલીઓએ એ પહેલા સ્કુલની પસંદગી કરવાની રહેશે. જે બાળકોને પહેલા રાઉન્ડમાં એડમિશન નથી મળ્યું, તેઓ બીજા રાઉન્ડમાં પ્રવેશ મેળવી શકશે. આ સિવાય જો સ્કુલ બદલવી હોય તો પણ વાલીઓ ફરીથી સ્કુલની પસંદગી કરી શકશે.

વધુ વાંચો: દિલ્હી બાદ હવે અમદાવાદની 3 સ્કૂલોને બોમ્બથી ઉડાવી દેવાની ચિમકી, ધમકીભર્યા મેઇલ મળતા દોડધામ

મહત્ત્વનું છે કે આ વર્ષે આરટીઈ હેઠળ પ્રવેશ માટે રાજ્યમાં 235300થી વધુ ફોર્મ ભરાયા હતા, જેમાંથી 15319 ફોર્મ ચકાસણી દરમિયાન રિજેક્ટ થયા હતા. આરટીઈ હેઠળ રાજ્યની 9800થી વધુ ખાનગી શાળાની 25 ટકા બેઠકો એટલે કે 45170 બેઠકો ઉપલબ્ધ હતી. RTE હેઠળ પ્રવેશ માટે બાળકનું જન્મ પ્રમાણપત્ર, રહેઠાણનો પુરાવો, પાસપોર્ટ સાઈઝનો ફોટો, જાતિ અને આવકનો દાખલો, તથા વાલીના આધાર કાર્ડ, રહેઠાણનો પુરાવો, આવકનો દાખલો જરૂરી હોય છે.